မန္တလေး၊ နိုဝင်ဘာ ၁၈
သိပ္ပံနှင့်နည်းပညာဝန်ကြီးဌာနသည် နိုင်ငံတော်ဖွံ့ဖြိုးတိုးတက်ရေး ကောင်းစွာ အထောက်အကူပြုနိုင်မည့် နည်းပညာဆိုင်ရာ လူ့စွမ်းအားအရင်းအမြစ်များကို အရည်အသွေးပြည့်မီစွာ မွေးထုတ်ပေးလျက်ရှိပြီး တိုင်းကျိုးပြည်ပြု နည်းပညာဆိုင်ရာ သုတေသနနှင့် စီမံကိန်းများကို ကြိုးပမ်းဆောင်ရွက်လျက်ရှိရာ ယနေ့၊နံနက်ပိုင်းက ဒုတိယဝန်ကြီး ဒေါက်တာအောင်ဇေယျသည် အိန္ဒိယသမ္မတနိုင်ငံ၏ နည်းပညာအထောက်အပံ့ဖြင့် တည်ထောင်ဖွင့်လှစ်ခဲ့သည့် မန္တလေးမြို့ရှိ မြန်မာသတင်းအချက်အလက်နည်းပညာတက္ကသိုလ် Myanmar Institute of Information Technology (MIIT) ၌ လုပ်ငန်းဆောင်ရွက်မှုအခြေအနေများကို ကြည့်ရှုစစ်ဆေးသည်။
ဦးစွာ ပါမောက္ခချုပ် ဒေါက်တာဝင်းအေးက တက္ကသိုလ်ဆိုင်ရာအချက်အလက်များ၊ Semester စနစ် ၊ Credit စနစ် ၊ Relative Grading စနစ်၊ Project-based learning စနစ်၊ အိန္ဒိယနိုင်ငံရှိ နိုင်ငံတကာ သတင်းအချက်အလက် နည်းပညာတက္ကသိုလ် International Institute of Information Technology, Bangalore (IIIT-B) နှင့် ပူးပေါင်း ဆောင်ရွက်မှုများကို ရှင်းလင်းတင်ပြရာ ဒုတိယဝန်ကြီးက သုတေသနလုပ်ငန်းများကို ပြည်သူများ၏ လူမှုဘဝ မြှင့်တင်မှုမှသည် ရေရှည်အကျိုးစီးပွားကို ဖော်ဆောင်နိုင်ရန်၊စွန့်ဦးတီထွင်လုပ်ငန်းများ MSMEsများ ဖွံ့ဖြိုးတိုးတက် ရေးမှသည် နိုင်ငံ့စီးပွား မြှင့်တင်ရာတွင် အထောက်အကူပြုနိုင်ရန်တို့အထိ အဓိကရည်ရွယ်ဆောင်ရွက်ရမည်ဖြစ်ပြီး နိုင်ငံတကာနှင့် ရင်ပေါင်တန်းကာ IT နည်းပညာများ နောက်ကျ မကျန်ခဲ့ရအောင်လည်း ဆောင်ရွက်ရမည် ဖြစ်ကြောင်း၊ ပြည်တွင်း ပြည်ပရှိ ဆက်စပ် တက္ကသိုလ်/ဌာနများနှင့် ပူးပေါင်းဆောင်ရွက်မှုများမြှင့်တင်ရန် လိုအပ်ကြောင်း တိုက်တွန်းမှာကြားကာ ဝန်ထမ်းများ၏ တင်ပြမှုများအပေါ် ဖြည့်ဆည်းဆောင်ရွက်ပေးသည်။
ယင်းနောက် ဒုတိယဝန်ကြီးသည် စာကြည့်တိုက်၊ စာသင်ခန်းများနှင့် သိပ္ပံလက်တွေ့ခန်းများတွင် ကျောင်းဖွင့်ချိန် မတိုင်မီ ပြင်ဆင်ထားမှုများ၊ Robotics Lab ၊ Communication Lab ၊ Embedded System Lab ၊ Control System Lab ၊ Computer Networking Lab ၊ Electronics Lab နှင့် အခြား Lab တို့တွင် လက်တွေ့ သင်ထောက်ကူပစ္စည်းများ ဖြည့်ဆည်းထားရှိမှုများ၊ ကျောင်းသား ကျောင်းသူများ၏ သုတေသနများဖြစ်သည့် Online Book Store System ၊ Online Flight Ticket Reservation System ၊ Smart HR System ၊ Electronic Product Recommendation System နှင့် အခြားသုတေသနများကို ကြည့်ရှုစစ်ဆေးပြီး AI ဆိုင်ရာ သုတေသနများ၊ ပြန်ပြည့်မြဲ စွမ်းအင်အခြေပြု Smart Grid နှင့် EV များတွင် အသုံးပြုသည့် IT သုတေသနများ၊ Cyber Security ဆိုင်ရာ သုတေသန များကို ဆောင်ရွက်ရန်နှင့် အခြားလိုအပ်သည်များကို မှာကြားခဲ့ကြောင်း သိရသည်။
