နေပြည်တော်၊ အောက်တိုဘာ ၂၀
၂၀၂၃ ခုနှစ်၊ အောက်တိုဘာလ ၁၆ ရက်မှ ၂၀ ရက်အထိ ဖိလစ်ပိုင်နိုင်ငံ၊ Bohol မြို့၊ “Bellevue Resort” တွင် (၈၄)ကြိမ်မြောက် အာဆီယံသိပ္ပံ၊ နည်းပညာနှင့် တီထွင်ဆန်းသစ်မှု ကော်မတီ (84th Meeting of ASEAN Committee on Science, Technology and Innovation – COSTI-84) နှင့် ဆက်စပ်ဆပ်ကော်မတီများ အစည်းအဝေးကို ကျင်းပခဲ့ရာ သိပ္ပံနှင့် နည်းပညာ ဝန်ကြီးဌာန၊ အမြဲတမ်းအတွင်းဝန် ဒေါက်တာစိုင်းကျော်နိုင်ဦးနှင့် COSTI နည်းပညာဆပ်ကော်မတီ အဖွဲ့ခေါင်းဆောင်များ တက်ရောက်ခဲ့ကြပါသည်။
COSTI 84 ဖွင့်ပွဲအခမ်းအနားတွင် အလှည့်ကျ ဥက္ကဋ္ဌ၊ Chair-COSTI ဘရူးနိုင်းနိုင်ငံ၊ ပို့ဆောင်ရေးနှင့် သတင်းအချက်အလက်ဆက်သွယ်ရေးဝန်ကြီးဌာန၊ အမြဲတမ်းအတွင်းဝန် Mr. Mohammad Nazri Mohammad Yusof က အဖွင့်အမှာစကားပြောကြားပြီး ဖိလစ်ပိုင်နိုင်ငံ၊ သိပ္ပံနှင့်နည်းပညာဝန်ကြီးဌာန၊ Undersecretary Dr. Leah J. Buendia က ကြိုဆိုနှုတ်ခွန်းဆက် စကားပြောကြားခဲ့ပါသည်။ ယင်းနောက် ASEAN Textile S&T Exposition ဖွင့်ပွဲအခမ်းအနားကို ဆက်လက်ကျင်းပပြီး ASEAN နိုင်ငံအလိုက် Textile နည်းပညာနှင့် ရိုးရာအဝတ်အစားများ ခင်းကျင်းပြသခဲ့ပါသည်။
COSTI နည်းပညာဆပ်ကော်မတီအလိုက် ဆွေးနွေးချက်များအား COSTI ကော်မတီ အစည်းအဝေးတွင် တင်ပြဆွေးနွေးခဲ့ကြပြီး အာဆီယံနိုင်ငံများအကြား ASEAN Technology Hub ထူထောင်ခြင်း၊ Artificial Intelligence ဆိုင်ရာ အလုပ်ရုံဆွေးနွေးပွဲများ ကျင်းပရေး Network on Bio-Circular and Green Economy ၊ ဒေသတွင်း သုတေသနအခြေခံအဆောက်အဦဆိုင်ရာ မဟာဗျူဟာအကောင်အထည်ဖော်ရေးကိစ္စများ ဆွေးနွေးညှိနှိုင်းခဲ့ပြီး အာဆီယံနှင့် မိတ်ဖက်အဖွဲ့ များဖြစ်သည့် အမေရိကန်ပြည်ထောင်စု၊ အင်္ဂလန်၊ ဥရောပသမဂ္ဂ တို့ဖြင့် သိပ္ပံ၊ နည်းပညာနှင့် တီထွင်ဆန်းသစ်မှုဆိုင်ရာ သုတေသနများ စာတမ်းရွေးချယ်အတည်ပြုခြင်း၊ အလုပ်ရုံ ဆွေးနွေးပွဲများနှင့် ညီလာခံများပူးတွဲကျင်းပရေးနှင့် အမျိုးသမီးသုတေသနပညာရှင်များ ပိုမိုပါဝင် ဆောင်ရွက်နိုင်ရေးနှင့် ဆုချီးမြှင့်ပေးနိုင်ရေးကိစ္စရပ်များကို သီးခြားစီ ဆွေးနွေးခဲ့ကြကြောင်း သတင်းရရှိပါသည်။
